يا مولاى زوجة يكون شلوخها ثلاثة

يا مولاي زوجة هي الرشومة تلاته
الاتنين نبكر بالبنية حلاته
بالطرب الشديد اترامحن خالاته
يات من شاله اوضح فمو في وجيناته

انصرف السبوع و اتن جميع اماته
باللتنين عزمنا على ضبح تسماته
اجتمعو الاحبة الجملة عزو حماته
واقفين كالكهارب يضووا لي مهماته

يات من حدقلو اسم بقت العباره جسيمه
سميناها آمنة إن شاء الله حق اسيمه
بت ارباب تحضرلو و تختو وسيمه
قبل المايقين يلمع كانو قسيمه

من جاي و جاي الناس يجو يشيلوها
امها ما المسيخه ما بتقول خلوها
زياده عن اللزوم الزارتن جلوها
في صنيقيرة باصيبعات مرد بلوها

تتعفف من الارض ان بقت دلوها
ماحت جاي وجاي من الدفاق تكلوها
بالرضاع و الجلاد و عقد المسك حلوها
هي يا الليله منوه اتشهدوا بتاكلوها

مي وسيخانه حاجه لطيفه
نفسك تنفتح وكتين تمسو قطيفه
ان جيت شلتها تجيك هي مليهيفه
و تاخد ليها ضحكة وتبردك بهيفه

حليوة حنينه
و رايق طبعها ذاته البريده لوينه
للمرسال تحضر مي القريزنه هيوينه
و مي شالقه ام شليق والله اعظم عينه

مما نشت بي باله
العجب ان جانا زول فد حبه مي خرباله
ان دخلت تقنب ما بتحوم شرباله
ان مرقت تشيل ناس خالتا القارباله

شوف امها شوف ذوقها ما اصفاها
ما بتقول بدور و بدور ما خصاها
بي كل القناعة رب العباد خصاها
انا ما وصيتا الا الناس تقول وصاها

سمحت وانجلت جو الجنيات موقفه حالي
كل العاجبو ولدو يجيني بي يا خالي
بريبة العفا الفي الدانقة مافي اخالي
بتموت بالضحك وكتين تقول لك (حالي)

تقول لي يابا اقولها امي اتي
تعالي لي الحاشا ما خشنتِ
قول للعاشقين بالبختِ موش بالبحتِ
و انا حلالي بيها اديها لي ود اختي

قولوا بخيت
جاها الباذل اللا هو لك و لا هو لكالك
عاد لا برحله ولا بقول ليها مالك مالك
و هي بتطيعوا كما قال طيعو اماكم مالك
قولوا آمين القاها و تكون هي كذلك